Nora Gashi është zgjedhur Presidente e Shoqatës Mjekësore Shqiptaro-Amerikane. Karriera e saj në mjekësi është e pasur, por së fundmi ajo ka qenë e angazhuar për tre muaj në vijën e parë të luftës kundër Covid-19 në spitalin White Plains në New York dhe më pas u zhvendos për të kryer misionin e saj në Queen Medical Center në Honolulu, ku ende po punon.
Më parë Nora Gashi ka punuar për 10 vite në vijën e parë në ndihmën e shpejtë në spitale të New York-ut. Në Amerikë ajo ka marrë çertifikata dhe kredite të shumta për punën e saj cilësore.
Dr.Nora Gashi është shqiptare nga Kosova, e lindur në Beograd, ish-Jugosllavi gjatë kohës që prindërit e saj punonin në atë zonë. Lidhja e saj me mjekësinë ka nisur që kur ishte e vogël, pasi edhe prindërit e Norës gjithashtu kanë qenë mjekë të njohur në Kosovë.
Gashi është diplomuar për mjekësi në Universitetin e Prishtinës dhe më pas ka punuar si mjeke residente në qendrën mjekësore Beth Israle në New York.
Nora Gashi ka emigruar në SHBA në vitin 1999, në kohën e luftës Serbi-Kosovë. Ajo gjithmonë ka ruajtur kontaktet me vendlindjen dhe komunitetin shqiptarë të Diasporës.
Nora është nënë e dy fëmijëve të rritur dhe në kohën e lirë pëlqen të udhëtojë, të gatuaj dhe të bëj ecje ose të lëvizë me biçikletë.
Shoqata Mjekësore Shqiptaro Amerikane (AAMS), Presidente e së cilës tashmë është Nora Gashi, u krijua si një organizatë profesionale, humanitare, jofitimprurëse. Misioni kryesor i AAMS është të sigurojë kujdesin dhe mbështetjen mjekësore aq të nevojshme për shqiptarët dhe të tjerët nga rajoni i Ballkanit.
