Është ndarë nga jeta në moshën 83-vjeçare, dirigjentja e parë shqiptare, Rozmari Jorganxhi dhe e ëma e kantautorit, Gjergj Leka. Jorganxhi ndërroi jetë sot, në Trieste të Italisë.
U shkollua në konservatorin ÇAJKOVSKI në Moskë në vitet 1950, për kanto dhe dirizhim, së bashku me të mëdhenjtë e muzikës shqiptare Zadeja, Daija, Paparisto, Mula, Leka, Athanas, Xhemali, Kaçaj etj, dhe pas përfundimit të studimeve u angazhua në Teatrin e Operas dhe Baletit në Tiranë.
Rozmari Jorganxhi e ka nisur karrierën e saj që në vitin 1959 si soliste lirike. Ishte “mezzosoprano” në TOB dhe ka interpretuar me profesionalizëm në nivele të larta role nga operat ndërkombëtare, por edhe ato kombëtare.
Nga viti 1967-1984, ajo ka dirigjuar korin e TOB-së duke qenë gruaja e parë dirigjente e këtij institucioni unik të kulturës shqiptare.
Në 1993-shin, Jorganxhi në moshën 56-vjeçare fiton audicionin dhe fillon si këngëtare profesioniste në teatrin “Giusepe Verdi” të Triestes ku këndoi për 10 vjet.
Jorganxhi ka dhënë dekada mësim në Universitetin e Muzikës, duke i dhënë kulturës shqiptare emra artistësh si në fushën e dirigjimit, ashtu edhe në atë të kantos.
Dritare.net i shpreh ngushëllimet familjes së dirigjentes!/K.C/dritare.net