Greqi/ Shkolla “Naim Frashëri” nis për të 13-in vit mësimdhënien e gjuhës shqipe
Shkolla shqipe ”Naim Frashëri” për mësimin e gjuhës dhe kulturës shqiptare në Patra, hap dyert e saj për të trembëdhjetin vit radhazi. Në lajmërimin e saj, ajo i fton që të mësojnë falas gjuhën amtare të gjithë shqiptarët me banim në atë qytet. Gjithashtu janë të mirëpritur të gjithë ata (shqiptarë e të huaj të çfarëdo moshe), që dëshirojnë të mësojnë gjuhën shqipe.
Mësimet, thuhet në njoftim fillojnë në tetor dhe do të zhvillohen në shkollat publike greke, sipas vendimit të Këshillit Bashkiak të qytetit të Patrës, duke respektuar masat e marra për parandalimin e virusit COVID-19. Ndërsa orët mësimore do të zhvillohen nga një staf pedagogjik i specializuar, i diplomuar në degët e mësuesisë, në shkollat e larta shqiptare.
Qendra e Botimeve për Diasporën për vitin akademik 2020-2021 ka dërguar falas 2623 tekste shkollore dhe të mësimit plotësues për të mbështetur mësimdhënien e gjuhës dhe kulturës shqiptare në Greqi.
