Franca si shumë vende të tjetra po përpiqet ti rikthehet normalitetit pas pandemisë Covid -19, rreziku i së cilës ende nuk ka kaluar plotësisht. Por teksa e gjithë bota pret me padurim daljen e vaksinës skenat e teatrove po rinisin aktivitetin e tyre. Baritoni i njohur shqiptar Gëzim Myshketa ka njoftuar nisjen e këtij sezoni me ngjitjen në skenën e teatrit “Berlioz” në Montpellier

“Për shkak të kërkesës së madhe të publikut prova gjenerale e datës 28 shtator në fakt do të jetë një premierë e produksionit të ri të “Berberit të Seviljes”, që do të përurojë Sezonin e ri Operistik në Operën “Berlioz” në Montpellier, një sallë me 2200 spektatorë. Kuptohet mirë që njerëzve u mungon PUNA dhe ARTI”, ka shkruar artisti në facebook.

Që prej shpalljes së pandemisë në muajin mars mijëra teatro në mbare botën anuluan shfaqet e tyre, duke mbyllur kështu çdo aktivitet artistik dhe duke pezulluar punën e mijëra artistëve, të cilët shpesh dhuruan performaca në ballkonet e shtëpive të tyre.  Shatori dhe muajt në vijim pritet të risjellin në normalitet kalendarët artistik në të gjitha vendet e botës.

Myshketa ka përgëzuar edhe nismën e Operës së Montpellier, e cila ka deklaruar se biletat për çdo shfaqje të këtij sezoni do të kushtoje 10 euro. “Një iniciativë që unë do ta quaja mbresëlënës pasi të gjithë duhet të kenë mundësi të shijojnë artin” shkruan Myshketa.

*Ndalohet kopjimi, riprodhimi dhe publikimi i materialit pa cituar burimin “Diaspora Shqiptare”.