Pas një pune përgatitore intensive me mësime të hapura dhe trajnimeve midis mësuesve të gjuhës shqipe nga të gjitha lagjet e Nju Jorkut nga Dr. Valbona Watkins, shkolla shqipe “AlbaLife” filloi mësimin e gjuhës shqipe për vitin shkollor 2020-2021. Do të jetë ndryshe ky vit shkollor pasi mësimet do të zhvillohen online për shkak të masave të marra ndaj pandemisë COVID-19. Vendim mëse i drejtë ky i marrë nga drejtuesit e shkollës të cilët pohojnë se për herë të parë në historinë e shkollës kanë pasur regjistrime të nxënësve edhe nga shtetet e tjera përfshirë edhe nga Washington State , i cili ka një diferencë prej 3 orësh me Nju Jorkun.
“Kjo metodë e mësimdhënies në shqip ushtrohet për herë të parë në të gjithë Diasporën shqiptaro-amerikane dhe ndodh pikërisht fal përkushtimit të të gjitha mësueseve ku gjej rastin në emër të bordit ti shpreh mirënjohjen e pakufishme si: Adelina Laçaj, Vlera Thaqi, Entela Muda, Brunilda Puli, Gela Bulku, Fatbardha Shaqirukaj, Mirvete Krasniqi Veselaj, Dr.Manjola Duli, Vjollca Skënderi dhe dy koordinatorët për Bronxin Arta Xhaferri dhe Blerim Gjocaj” tha për “Diaspora Shqiptare” drejtorit të shkollës Shqipe “Alba Life” z.Qemal Zylo.
Në orën e parë të mësimit të zhvilluar këtë fundjave nxënësit kanë nisur mësimin e pare duke kënduar “Himnin e flamurit”. “Në emocion i madh shprehen mësuesit”, pasi kjo tregon që fëmijët dëshirojnë të krijojnë një lidhje të fortë me vendin e origjinës.
“Si një mësuese me një përvojë me dekada midis dy kontinenteve Europës dhe Amerikës, kurrë nuk e kisha provuar një ditë të parë të shtatorit që t’i takoja nxënësit në ekranin e kompjuterit. Atje pashë fytyrat e tyre të qeshura dhe të bukura me librin përpara të Abetares dhe të Gjuhës Shqipe. Ishte një përvojë që do të më ngelet gjithë jetën në fletët e ditarit tim të kujtesës dhe sytë e tyre gjithë dritë ndriçonin dhe më shumë botën e izoluar nga pandemia. Mësueset me shumë profesionalizëm ditën të mbanin të fokusuar para ekranit gjithë nxënësit e klasave të tyre dhe ky ishte një sukses i dukshëm” thotë Kozeta Zylo, koordinatore per procesin mesimor në shkollën Alba Life
Mesuesit e gjuhës shqipe gjatë muajve të verës morën pjesë në disa seminare të organizuara nga shkolla për përgatitjen e mësimit online.’
