Të gjitha llogaritë bankare të shtetasve shqiptare dhe të huaj, ta hapura në vendin tone, do të jenë pjesë e një regjistri qendror të posaçëm, të ngritur për këtë qëllim.  Ministria e Financave ka hedhur për konsultim projektligjin për “Regjistrin qendror të llogarive bankare”, i cili ka si qëllim  të përcaktojë mënyrën e raportimit dhe shfrytëzimit të të dhënave të llogarive bankare, si dhe aksesin dhe shfrytëzimin e këtij regjistri me qëllim identifikimin e pasurive të dyshuara me prejardhje nga veprimtari kriminale, nëpërmjet transaksioneve bankare.

Sipas draftit, regjistri do të përdoret pikërisht si një mjet për zbulimin, identifikimin dhe hetimin e veprimtarisë kriminale, ndjekjen penale të autorëve të veprave penale, zbulimin, gjurmimin ose identifikimin e pasurive të dyshuara me origjinë nga veprimtari kriminale si edhe detyrimeve tatimore. Gjithashtu, përcaktohet se objekt i rregullimit të ligjit janë jo vetëm llogaritë bankare por edhe kasetat e sigurisë të mbajtura nga klientët e institucioneve financiare.

Ky projektligj plotëson vakumin ligjor që ishte deri më tani, duke iu përshtatur direktivës së Bashkimit Europian “Kundër pastrimit të parave”. Sipas projektligjit, nëpërmjet ngritjes së regjistrit, caktimit të subjekteve që kanë detyrimin e raportimit pranë regjistrit të krijuar për këtë qëllim, duke përcaktuar njëkohësisht dhe institucionet që kanë të drejtat dhe detyrime për aksesimin dhe përdorimin e të dhënave të tij, synohet krijimi i një mekanizmi efektiv për zbulimin dhe parandalimin e aktivitetit kriminal në ekonomi dhe vendosjen në dispozicion të informacioneve të sakta dhe të përditësuara për çdo mbajtës të llogarive bankare. SCAN