Këshilli i Ministrave ka vendosur në mbledhjen e radhës akordimin e 9 bursave të studimit për shtetasit e huaj me origjinë shqiptare, për të studiuar në Republikën e Shqipërisë, propozim i paraqitur nga Ministri i Shtetit për Diasporën.
Sipas vendimit nëntë bursat për shtetasit e huaj me origjinë shqiptare për vitin akademik 2020-2021 përfshijnë mbulimin financiar për tarifën e studimeve, si dhe shpenzimet e akomodimit e të ushqimit për kohëzgjatjen e vitit akademik të cilat do të përballohen nga buxheti i Agjencisë Kombëtare për Diasporën.
Me qëllim mësimin dhe thellimin e njohurive të gjuhës së origjinës do të përfitojnë tre bursa studentët e huaj me origjinë shqiptare nga Ukraina, dy bursa studimi shtetasit e huaj me origjinë shqiptare të komunitetit Arbëresh në Itali, dy bursa studimi shtetasit e huaj me origjinë shqiptare në Kroaci dhe dy bursa studimi shtetasit e huaj me origjinë shqiptare nga Bullgaria.
Propozimet për kandidatët për përfitimin e bursës do të vijnë nga misionet diplomatike dhe postet konsullore të Republikës së Shqipërisë të akredituara në këto vende, të cilat janë përgjegjëse për dërgimin e dokumentacionit të kërkuar për kandidatët përfitues të bursës.
Dokumentacioni që do të paraqitet nga aplikantët duhet të jetë i legalizuar në përputhje me legjislacionin që rregullon njohjen dhe përdorimin e dokumenteve zyrtare të lëshuara jashtë
vendit.
Kriteret për përfitimin e bursës
Kriteret bazë që duhet të plotësoj aplikanti për përfitimin e bursës janë:
- Të ketë mbaruar arsimin e mesëm me një mesatare të përgjithshme mbi 8 (tetë) ose të barasvlefshme me të;
- Të mos jetë i diplomuar në ciklin e plotë të studimeve universitare;
- Të jetë student nga komunitetet shqiptare të Diasporës dhe që jeton në një nga vendet e lartpërmendura.
Kriteret për përfitimin e bursave, sipas programeve ku do të studiojnë shtetasi e huaj me origjinë shqiptare, përcaktohen me marrëveshje ndërmjet Agjencisë Kombëtare të Diasporës (AKD) dhe Agjencisë së Sigurimit të Cilësisë në Arsimin e Lartë (ASCAL). Për ndjekjen e procesit dhe vlerësimin përfundimtar të dokumenteve të kandidatëve të cilët do të përfitojnë bursë studimi, institucionin e arsimit të lartë dhe programin e studimit ku do të studiojnë krijohet Komisioni i Bursave për Diasporën, me urdhër të ministrit përgjegjës për Diasporën.
Ai përbëhet nga 3 (tre) anëtarë të cilët do të propozohen nga ministria përgjegjëse për arsimin (1 anëtar), ministria përgjegjëse për politikën e jashtme (1 anëtar) dhe Agjencia Kombëtare e Diasporës (1 anëtar).
Agjencia Kombëtare e Diasporës do të kryejë pagesat e mësuesve të nevojshëm për mësimin e gjuhës shqipe në vitin e parë të studimeve për shtetasit e huaj me origjinë shqiptare të cilët përfitojnë bursa studimi nga Republika e Shqipërisë për vitin akademik 2020-2021.
Financimi i bursave në zbatim të këtij vendimi, për vitin akademik 2020-2021 ka një vlerë prej 71 520 (shtatëdhjetë e një mijë e pesëqind e njëzet) eurosh, i cili do të përballohet nga buxheti i Agjencisë Kombëtare të Diasporës.
Vendimin e plotë mund ta lexoni këtu: