Shqipëria po bëhet gati të bëjë të studim fizibiliteti për vendosjen e pikave të karikimit për makinat elektrike.
Agjencia për Efiçencën e Energjisë ka hapur një tender me fond limit 68.7 milionë lekë për realizimin e këtij studimi.
“Qëllimi i këti shërbimi është realizimi i studimit të fizibiliteti dhe më pas i projekt idesë, për përcaktimin e një rrjeti për vendosjen e stacioneve të karikimit të makinave elektrike në territorin e Republikës së Shqipërisë.
Për këtë qëllim duhet të realizohen të gjitha investigimet e nevojshme për të mbledhur informacionin e saktë dhe në mbështetje të tyre të merren masat e nevojshme inxhinierike për hartimin e projektit.
Konsulenti duhet të studiojë dhe të marrë në konsideratë çdo projekt apo studim të mëparshëm në këtë fushë. Për hartimin e studimit të fizibilitetit duhet të analizohen të gjitha mundësitë alternative që sot përdoren në Bashkimin Europian e shoqëruar dhe me një analizë financiare në lidhje me investimin e realizimit të këtij sistemi. Konsulenti duhet të shqyrtojë të gjitha variantet e mundshme që ai do t’i shohë të arsyeshme.
Realizimi i fizibilitetit është pjesë shumë e rëndësishme e studimit pasi në të do të përcaktohet se cili sistem karikimi do të përdoret në Republikën e Shqipërisë dhe do të përcaktohet një rrjet mbulimi që do të përfshijë të gjithë territorin. Ky studim do të shoqërohet me një studim të ndikimit në mjedis duke e shoqëruar dhe me analiza të sakta të ndërhyrjes apo ndërthurjes me ekosistemin e zonës, dhe ndikimeve sociale që ai mund të sjellë” shkruhet në dokumentet e tenderit.
Numri i makinave elektrike në vitet e ardhshme do të rritet dhe potenciali i tyre do të shfrytëzohet vetëm nëse rrjeti elektrik menaxhohet ashtu siç duhet.
Është vlerësuar se kërkesa për makina elektrike do të rritet me shpejtësi, ku rreth 23% të automjeteve të transportit rrugor do të kalojnë në makina elektrike në 2030, sipas International Energy Agency (2018). Në vitin 2018, Shtetet Anëtare të BE-së dhe Parlamenti Europian kanë ranë dakord për një klasifikim të ri të emetimeve të CO2 për automjetet e reja, për të stimuluar furnizimin e emetimit zero dhe të ulët te automjetet. / Scan
