Shkrimtari i njohur amerikan Thomas R. Perrotta, i njohur si Tom Perrotta, ka origjinë arbëreshe. Këtë e ka theksuar edhe në një intervistë të pak ditëve më parë për një televizion amerikan, ku ka theksuar se të atin e ka italian, ndërsa e ëma është arbëreshe dhe u ka folur gjithmonë shqip të tre fëmijëve të saj.
Ajo më parë kishte punuar sekretare, por mbas lindjes së tre fëmijëve, ishte marrë me rritjen dhe edukimin e tyre.
Në një intervistë të mëparshme për “The Guardian”, Perrotta ka theksuar se nga e ëma kishte marrë ambicien për të vazhduar shkollën dhe ecur përpara në jetë.
“Ajo kishte dashur të bëhej mësuese, por nuk i përballonte dot shpenzimet e kolegjit, ndaj na inkurajonte ne që të mësonim”, ka thënë shkrimtari dhe skenaristi i njohur.
Ai ka lindur më 13 gusht 1961 në Newark, New Jersey, ndërsa gjyshërit e tij kishin emigruar në Shtetet e Bashkuara të Amerikës nga një fshat i Avellino-s në Itali.
