Siçilia nuk ka qenë ndër zonat më të prekura në Itali nga pandemia Covid – 19, megjithatë komuniteti Arbëresh ka dhënë një kontribut të konsiderueshëm në menaxhimin e situatës së shkaktuar nga virusi, jo vetëm në komunitetin e tyre lokal, por edhe për qytetet më të prekura në veri të Italisë.
Alessandro Cuccia, Konsulenti i IOM për rajonin e Siçilisë tregon për nismat e Komunitetit Arbëresh gjatë kësaj kohe.
“Qyteza arbëreshe në Sicili, “Piana degli Albanesi” ose “Hora e Arbëreshevet”, si gjithë qytetet e tjera të Sicilisë dhe të Italisë, ishte e detyruar te adaptojë jetesën e përditshme me rregullat e reja për ta përballuar emergjencën që shkaktoi pandemia Covid – 19.
Ndalimi i daljes nga shtëpia pa leje, përveç për arsye shëndetësore dhe specifike, ka zbrazur rrugët, lokalet dhe dyqanet u mbyllen duke e shndërruar qytetin në një qytet fantazmë.
Arbëreshët, ashtu si shqiptarët apo italianët e jugut, janë njerëz të ngrohtë dhe mikpritës, ndaj dhe distancimi social ka qenë shumë i vështirë emocionalisht për ne.
Ndryshe nga Italia e veriut që ka qenë nder me te prekurat ne Evrope nga Covid – 19, fatmirësisht, edhe duke respektuar rregullat e qeverisë, deri sot nuk kemi pasur asnjë rast i infektimi.
Së fundmi, masat janë lehtësuar dhe duket sikur jeta po rilind dalëngadalë së bashku me shpresën që virusi do të zhduket.
Një ndër punët më të zakonshme midis arbëreshëve është puna e infermierit. Cdo ditë e natë, gjatë gjithë kohës së pandemisë dhjetëra arbëreshët kanë lënë menjanë frikën dhe kanë udhëtuar për në Palermo, për të qenë në krye të detyrës, për të shërbyer dhe shpëtuar jetë njerëzish. Ka edhe shumë mjeke dhe infermiere arbëreshë që jetojnë dhe punojnë jashtë Sicilise, si për shembull në Lombardi, zona me e prekur nga pandemia, të cilët kanë qenë në vijën e parë të betejës, duke vene veten dhe profesionin e tyre në dispozicion të të sëmurëve.
Bashkia e Piana degli Albanesi, ka krijuar një “Task Forcë” të përbërë nga të gjithë mjekët e qytetit, Kryetari i Bashkisë dhe forcat policore.
Kjo “Task Forcë” ka monitoruar situatën dhe respektimin e rregullave të karantinës. Gjithashtu, në bashkëpunim me “Mbrojtjen Civile”, “Task Forca” ka siguruar ushqimet dhe ilaçet për njerëzit më ne nevoje, si dhe ka dhuruar më shumë se 7 mijë maska. Gjithashtu gratë arbëreshe kanë prodhuar dhe dhuruar shumë maska. Janë bërë dezinfektime dhe tamponë për të gjithë të moshuarit dhe për njerëzit me nevoja të veçanta, si dhe për stafin përkatës të tyre. Profesorë të njohur arbëresh, kanë vënë në dispozicion njohuritë e tyre për të përdorur dispozitivët, oksigjenoprodhuesit në spitale.
Kjo është puna e përulur që kanë bërë dhe vazhdojnë të bëjnë arbëreshët çdo ditë, duke treguar se janë një komunitet shumë i pranishëm, në ditë të zakonshme dhe në momente të vështira si kjo qe jemi duket kaluar. Ata kanë dhënë dhe do te japin kontributin e tyre në zhvillimin dhe mirëqënien e të gjithë Italisë dhe vendit të tyre të origjinës, Shqipërisë.
