Në vitin 1927, me anë të një letre, shoqëria e studentëve shqiptarë në Austri i drejtohet Lef Nosit për të kërkuar ndihmën e këtij të fundit në grumbullimin e donacioneve për ribotimin e organit të saj “Djalëria”

I ndershëm Zotni
LEF NOSI

Shoqnija e studentvet shqiptarë t’Austris “Albania” në Vjenë, ka qëllimin me ribotue organin e saj “Djalëria” e cila pat fatin e keq nga çeshtjet e vështira financijare të pushojë për nji kohë të gjatë.

“Albania” e përkrahun gjithmonë nga shqiptarët atdhetarë e bamirës, merr nderin e ju lutet zotnisë së juej të keni mirësin të merrni iniciativën me mbështjellë ndihma nga shqiptarët patriotë e dorëdhanës, të cilët si kurdoherë edhe këtë rradhë s’kan me u kursye për veprën e shenjtë të studentëvet shqiptarë t’Austris, “Djalëria”.”

Lef Nosi (1877-1945) ishte nënshkrues i Deklaratës së Pavarësisë së Shqipërisë, patriot, arkivist, folklorist, etnograf, arkeolog e politikan shqiptar. Njihet si babai i filatelisë shqiptare, personalitet me interesa të gjëra kulturore. Veprimtaria e tij politike-shoqërore ishte pothuajse e pandarë me atë personale. Pranë Arkivit Qendror Shtetëror tërësia e letrave të ardhura në adresë të tij arrin më tepër se 1200, mes tyre edhe me Norbert Joklin, Holger Pedersenin por edhe të rinj që e shihnin me admirim si Qemal Stafa.