Në një kohë kur operat dhe skenat teatrale janë mbyllur, projektet online dhe të formave të tjera të artit po marrin jehonë. I tillë është edhe albumi i ri që premton të nxjerrë në treg më 25 shtator sopranoja shqiptare Ermonela Jaho.

Ai titullohet “Anima Rara” dhe është një jehon për një nga zërat më të mirë lirikë, Rosina Storchio. Sopranoja shqiptare shprehet entuziaste për këtë projekt dhe tregon përmes rrjeteve sociale se ka mësuar shumë në këtë rrugëtim.

“Nuk janë vetëm Traviata apo Maddame Butterfly pjesë të njohura e të famshme të kulturës operistik, por ka edhe shumë të tjera që meritojnë këtë vëmendje. Në këtë eksperiencë po mësoj shumë gjëra të reja. Ka materiale që po i studioj për herë të parë. Më duket vetja si studente tani. Është një eksperiencë kaq e bukur të të mësuarit si studente pas 25 vitesh, të kesh të njëjtën dëshirë për të zbuluar gjëra të reja”, shprehet sopranoja.

“Nuk njoh asnjë soprano tjetër të performojë një repertor të tillë në një mënyrë kaq ekspresive sa Ermonela Jaho”, shprehet Henry Little, drejtori ekzekutiv i Opera Rara.

“Ajo është një nga këngëtaret më serioze, më të përgatitura që kam njohur në këtë repertor”, tha Andrea Batistoni, dirigjent.

Në “Anima Rara” Ermonela interpreton 14 arie, të cilat në një orë e 10 minuta sjellin muzikën klasike më të vlerësuar në botë.