Libri i shkrimtarit arbëresh Carmine Abate “La moto di Scanderbeg” (Motori i Skënderbegut), është përzgjedhur si një ndër 100 librat më të mirë të letërsisë italiane të shekullit të XX.

Në posterin që është postuar sot në faqen zyrtare të autorit në rrjetin social Facebook, paraqitet një organizim në formë peme me degëzimë, e titulluar “Pemët e letërsisë”, dhe e realizuar nga Simone Caltabellota e Edoardo Camurri të entit botues Atlantide Edizioni.

Në këtë renditje romani “Motori i Skënderbegut” është i pozicionuar lart në të djathtë, në degën e dedikuar botimeve të vitit 1999, kur ka dalë nga shtypi botimi i parë i kësaj vepre. Së fundmi kjo vepetër është ribotuar nga shtëpia e njohur botuese Mondadori. Abate ndër të tjera dallon në krijimtarinë e tij për rimarrjen e temave ku theksohet tiparet dhe veçantitë e identiteti kombëtar shqiptar, dhe subjektet e romaneve të tij flasin për situata dhe ngjarje që lidhen me mendësinë e apo pasojat e të qenit pjesëtar i komunitetit arbëresh. Edhe në këtë roman, që në titull lexuesi nënkupton se personazhi kryesor i tij është një individ me kombësi shqiptare. Aty trajtohet marrëdhënia e ndërlikuar e djalit (personazhit kryesor) me të atin, që quhej Skënderbeg dhe paralelisht me këtë zhvillohet edhe linja e dashurisë mes të riut dhe një vajze me kombësi italiane.