Artistët jo vetëm që shquhen si Ambasadorët e një Kombi, por janë edhe Gjeneralët më të mëdhenj të shpresës, ata janë përherë në vijën e parë të frontit, në të gjitha betejat e jetës.
Kjo u dëshmua më së miri edhe në këtë kohë karantine.
Kur pandemia e shkaktuar nga COVID-19 i mbylli gjitha dyert, dhe atdheu na dukej se po largohej në distancë, ishin artistët që nuk u ndalën asnjë çast .
Ndër gjërat më të bukura krijuar në kohë karantine janë për tu veçuar edhe pikturat e shkrimtares Lira Bojkut.
Pikturat e Lirës në kohë karantine më kujtojnw thënien e një intelektuali japonez: “Njerzt e mirë, ata bartin mision hyjnor, dijnë ta kthejnë terrin në dritë, dimrin në verë, bakrin në diamant, të tillë janë ata, misionarë”.
Lira është jo vetëm shkrimtare, por një vajzë me pasion të madh edhe në pikturë, një vajzë e vlerave.
Është shkrimtare e njohur, është vajza e shkrimtarit të madh Fejzi Bojkut.
Në të gjitha artet e saja, ajo prek sukseset e një niveli të lartë. Ka krijuar edhe shumë piktura të tjera që bartin një bukuri tejet universale. Me një shije të hollë me ngjyra që dhurojnë harmoni e shpresë, spikatet piktura e saj me shumë pozitivitet.
Artistja përmes pikturave të saj bën një rrugëtim shprese nga karantina në liri , kjo vlerë reflekton shumë në publikun, në mbresën e tij.
Një zog në krahun e një zonje, është një detaj tjetër artistik në pikturën e saj, që flet për dashurinë, paqen, për kujdesin ndaj natyrës dhe krijesave të saj, porosit për një harmonie për një higjienë të bukur mendore.
Lira me vizatime është marr që nga mosha e fëmijërisë. Vizatimet e saja janë pjesë e ilustrimeve në disa libra, e kopertina librash.
Gjatë karantinës më shumë është fokusuar në shkrimin e librit të katërt me radhë, me tregime të shkurta dashurie që është në përfundim e sipër.
Sa i përket pikturave, në kohë karantine, ka krijuar pesë piktura.
Rreth frymëzimit të saj, intelektualja nga Shkupi, Lira Bojku, për Gazetën e Diasporës , shprehet :
“Frymëzimi , si për shkrime po edhe në vizatime tek unë në piedestal gjithmonë qëndron gjinia femërore, gruaja, e bukura… andaj në pikturat gjatë karantinës sërish më frymëzoi bukuria e vashës, e gërshetuar këtë herë me të gjitha ngjyrat e bukura të ylberit të derdhura në trup e flokë, me të gjitha ngjyrat e pranverës që po na ikte para syve e nuk guxonim të dilnim e ta shijonim…ngjyra të flakta, të zjarrta, me shpresë dhe dëshirë për t’iu rikthyer sërish të bukurës, natyrës, estetikës, qetësisë shpirtërore e mendore…e qëndisur me të gjitha llojet e luleve (që karantina nuk na lejonte ti kundërmojmë) dhe me zogun në krah (gati për fluturim) ….eh, sa prej nesh dëshiruan të ishin zogj e të fluturonin të lirë në kohën e karantinës kur ishim “të prangosur” në shtëpi…sa prej nesh e kuptuan rëndësinë dhe vlerën e lirisë …vlerën e shëndetit…natyrës dhe ajrit të pastër…mendjes dhe zemrës së pastër dhe jo vetëm aq….”
Vet përzgjedhja e ngjyrave dhe motivi, flasin shumë për shpirtin e saj artistik.
Ajo me pikturat e saj, i kalon të gjitha barrierat dhe komunikon me publikon duke na dhënë një shkëlqim shprese me vete.
Piktura tjetër nga karantina “Vajza nga Lezha” që ka në fokus po ashtu një grua, edhe kjo pikturë tregon një civilizim kombëtar.
Artistja me këtë vizatim sjell vëmendjen tek arti i krijimit të gjërave të bukura , na e kujton punën e dorës , një art që mundë të krijohet sidomos në kohë karantine.
“Vajza nga Lezha” ka jo vetëm qëndrimin e një vajze krenare e të zgjuar, por veshja e saj kombëtare është për tu lakmuar.
Pikturat e Lirës e kanë vendin në muzeun kombëtar.
