Komisioni Parlamentar i Ligjeve ka miratuar Projektligjin për shtetësinë, i cili sjell disa risish nga ligji aktual që është në fuqi që prej vitit 1998.

Risitë u prezantuan në Komision nga Zëvendësministrja e Brendshme, Rovena Voda, e cila theksoi se ligji aktual nuk ofron zgjidhje për rastet e fitimit të shtetësisë në bazë të origjinës, apo të një problematike të vjetër tashme që ka sjellë pamundësinë e regjistrimit në Regjistrin Kombëtar të Gjendjes Civile, të vitit 2010, të personave, të cilët kanë fituar shtetësinë shqiptare me Dekret Presidencial.

Por sipas Vodës, problematika kryesore që zgjidh ligji i ri është hapja e mundësisë Regjistrimin në Gjendjen Civile të personave mbi 18 vjeç, të cilët kanë lindur jashtë territorit të Republikës së Shqipërisë nga prindër shqiptarë apo qoftë edhe njëri prind shqiptar, por që para kësaj moshe nuk janë regjistruar. Me këtë problem përballen më së shumti familjet shqiptare që jetojnë në Greqi.

Projektligji do të shqyrtohet këtë javë nga Komisionet Parlamentare për t’u votuar në Kuvend në seancën e javës së ardhshme. SCAN