Redi Zyka padyshim që mund të quhet një shqiptar i suksesshëm në Kanada. Ai ja ka dalë që të depërtojnë në kinematografinë e shtetit kanadez, ndonëse deri më tani në role të vogla, por ëndrra është e madhe dhe ambicia nuk mungon.
Në një intervistë për “Diaspora Shqiptare” ai ka shpjeguar rrugëtimin e tij nga Fieri drejt Kanadasë kur ishte vetëm 13 vjeç dhe jetën e tij të re në vendbanimin e ri.
Kur keni shkuar në Kanada? Si kane qenë fillimet tuaja atje dhe vështirësitë që keni pasur për tu përshtatur?
Unë në Kanada kam shkuar kur kam qenë 13 vjeç në vitin 2001, në Shqipëri kam studiuar deri në klasë të shtatë dhe më pas kemi ardhur në Kanada.
Fillimisht kam studiuar për mekanik, por me pas kam marrë kurse trajnimi për aktor.
Në fillim si çdo person në emigrim kemi pasur vështirësitë tona. Filluam gjithçka nga e para, u ambientuam në punë dhe tani jemi ku jemi.
Kur keni filluar që të merreni me aktrim?
Me aktrim kam filluar pak vonë, në moshën 28 vjeçare. Fillimisht me role të vogla si figurant, pastaj erdhen rolet me dialog etj.
Sa i lidhur jeni me Shqipërinë?
Me Shqipërinë jam shumë i lidhur dhe do dëshiroja shumë të kem bashkëpunime në të ardhmen në vendlindjen time.
Cila është ëndrra juaj më e madhe?
Ëndrra ime më e madhe mbetet në fushën e aktrimit, do doja të arrija më lart me role antagoniste në filma të mëdhenj.
Deri më tani kam marrë pjesë në filma me zhanër të ndryshëm, independent kanadez ku më të shumtat e rasteve kam patur rolin e antagonistit, por kam marrë pjesë edhe në komedi, dramë, sport, web series si dhe reklama të ndryshe kanadeze. Kam marrë pjesë edhe në disa filma me seri amerikane si aktor figurativ të cilat mund ti shihni në Netflix.
Për momentin jam duke realizuar një film në të cilin jam personazh antagonist. Jemi në xhirimet e para dhe nëse çdo gjë ecën mirë, do jetë gati në 2021.
Si është komuniteti shqiptar në Kanada, jeni i angazhuar?
Komuniteti shqiptar në Kanada mundohet të mbajë bashke shqiptarët. Ata organizojnë çdo aktivitet që realizohet edhe në Shqipëri. Pavarësisht se këtu janë më ndryshe gjërat, ata mundohen të angazhojnë shqiptarët dhe të ruajnë traditat tona.
Para pandemisë merrja pjesë në çdo aktivitet që organizonte shoqata shqiptare në Calgary. Jemi të lumtur sepse i përjetojmë festat si në Shqipëri.
