Fermerët krahas rritjes së prodhimi bujqësor vendas synojnë edhe arritjen e standardeve më të mira europiane, me qëllim zgjerimin e eksporteve të sigurta në tregjet e huaja.

32 ferma bujqësore kanë aplikuar në Skemën Kombëtare të mbështetjes në Bujqësi 2020, për të përfituar financim në certifikimin e prodhimit sipas standardit Global GAP.

Agjencia e Zhvillimit Bujqësor dhe Rural bën të ditur se, Skema Kombëtare këtë vit për herë të parë ofron subvencion për certifikimin e prodhimit bujqësor sipas Global GAP, që është standardi më i lartë europian, për sa i takon produkteve bujqësore, që garanton eksport të sigurt drejt vendeve të BE-së.

Mbi 5 milionë lekë arrin deri tani vlera për 32 aplikimet e kryera nga fermerët nga 12 qarqe të vendit, bën të ditur AZHBR. Aplikimet në Skemën Kombëtare mbyllen nesër, më 19 qershor. / ATA