Saimir Pirgu, tenori shqiptar i njohur në botë për interpretimet e tij në teatrot më të mëdha në një intervistë televizive ka treguar përditshmërinë e tij gjatë periudhës së pandemisë.
Pirgu i cili jeton në Itali u shpreh se një nga momentet më të bukura të solidaritetit dhe mbështetjes qytetare gjatë pandemisë ka qenë dalja e njerëzve nëpër ballkone duke kënduar në nder të punës së mjekëve.
“Muajin e parë isha i gëzuar që po qëndroja më shumë ditë në shtëpinë time këtu në Verona. I mbyllur vetëm dhe brenda në shtëpi, problem kryesor ishte që dëgjoja shumë ambulanca gjatë gjithë kësaj kohe dhe trishtimi ishte më se normal. Në muajin e dytë filloi një mërzitje E lehtë në momentin që teatrot filluan të anulonin shfaqet dhe u kuptua që kjo gjë mund të rrezikonte gjithë vitin. Tani jemi në muajin e tretë. Gjendja afërsisht po kthehet në normalitet. Për sa i përket argëtimit në ballkone, jua lashë vendin qytetarëve,”- tregon ai.
Me rikthimin në normalitet, tenori i njohur foli edhe në lidhje me projektet që e presin. Ai tregon se korriku, do të jetë një muaj i veçantë për të pasi përkon me kthimin e teatrove në ambiente të hapura.
“Ne (artistët) ishim të parët që pandemia preku, jemi po të parët që po hapemi dhe ka premisa që në korrik t’i kthehemi teatrove të hapura. Arena e Veronës ka konfirmuar një koncert. Ka premisa që në çdo teatër në ambiente të jashtme, të organizohet diçka për të dhënë idenë e shpresës. Jam më se i gëzuar që ndonëse Italia vuajti shumë, ka nisur të ndërmarrë iniciativa pozitive,”- shton Pirgu.
Periudha e pandemisë sigurisht që ka ndikuar negativisht edhe tek tenori Pirgu. Ai tregon planet që i janë prishur gjatë këtyre muajve:
“Më tepër se 27 shfaqje deri në shtator të anuluara. Frika është se që nga shtatori e më tej, mund të anulohen dhe të tjera. Vështirësia në kalendarin tim artistik është se shfaqjet janë në shtete të ndryshme dhe nëse karantina nga njëri shtet në tjetrin do të jetë aktive, do të jetë e vështirë realizimi i shfaqjeve. Jemi në pritje, të shohim se si do të veprohet në vjeshtë ose në dimër këtë vit,”- pohoi tenori.
Viti 2020, është konsideruar një vit i vështirë për të gjithë. Pyetjes se si pretendon ta mbyllë këtë vit, Pirgu i përgjigjet:
“Nuk e di është një parashikim shumë i vështirë. Kam bërë paqe me veten që në jetë ka edhe vështirësi, ka edhe momente të vështira dhe ky është një nga këto momente. Kemi edhe shëndetin, do ta përballojmë. Duhet qetësi dhe pjekuri për ta përballuar ashtu siç do të vijë”, – shtoi më tej.
