Më në fund pas pezullimit disa mujor futbolli austriak rikthehet sërish në fushën e gjelbër. Por përpara se të rifillojë Bundesliga austriake, sot në mbrëmje do të luhet finalja e kupës së Austrisë. Kjo ndeshje e shumë pritur zhvillohet mes ekipit të Austria Lustenau dhe kampionit të Austrisë, Red Bull Salzburg. Përveç rikthimit pas pandemisë këtë ndeshje e bën interesante dhe përballja mes dy lojtareve shqiptarë.

Futbollistët Ismet Osmani dhe Mërgim Berisha do të “luftojnë” me njëri-tjetrin për të fituar trofeun e vlefshëm në shtetin e Austrisë.

Ismet Osmani luan si mesfushor tek Austria Lustenau dhe është 19-vjeçar, i cili këtë edicion për skuadrën e tij ka shënuar dy gola. Ndërkohë, Mërgim Berisha, 22-vjeçar është një nga sulmuesit më premtues shqiptarë në Austri dhe luan për Red Bull Salzburgun.

Ndeshja mes Austria Lustenau dhe Red Bull Salzburg zhvillohet sot në mbrëmje në ora  20:45 në Würthersee Stadion, në Klagenfurt.