Sulmuesi shqiptar Xhakomo Vrioni është thirrur nga trajneri italian Maurizio Sarri për t’u stërvitur me ekipin e Juventusit. I lindur në vitin 1998, Vrioni është pjesë e kuqezinjëve U-21, ndërsa ka debutuar edhe me Kombëtaren A.

Trajneri i Juventusit dëshiron që të shohë më afër shumë prej talenteve që vijnë nga akademia dhe të rinjtë. Për këtë arsye ka grumbulluar nëntë prej tyre, mes të cilëve bën pjesë edhe Xhakomo Vrioni.

Sulmuesi ka fatin që stërvitet dhe të mësojë prej yjeve të futbollit europian, ndërsa nga ana tjetër të bindë edhe trajnerin Sarri.

Duke parë ndryshimet e rregullave dhe 5 zëvendësimet që tani janë vendosur si kriter, kërkohen më shumë elemente për të përballuar fundin e sezonit dhe për këtë arsye do t’i besohet edhe më të mirëve që vijnë nga të rinjtë.

Vëmendja e tifozëve drejt futbollistëve shqiptarë që luajnë jashtë kufijve është shtuar edhe më shumë pas futbollistit Rei Manaj, i cili, për shkak të pushimit të gjatë nga pandemia Covid-19, nuk po stërvitet më me ekipin e Barcelonës, sepse kjo periudhë kohore bëri që tek katalanasit të riktheheshin disa prej lojtarëve të dëmtuar.