Programi i IOM Albania “Angazhimi i Diasporës Shqiptare në Zhvillimin Social dhe Ekonomik të Shqipërisë”, punon me komunitetet shqiptare në të gjithë Italinë. Konsulentët shqiptarë në rajonet: Lombardi, Emilia Romagnia, Toscana, Piemonte, Lazio dhe në komunitetin Arbëresh janë dëshmitarë të ndikimit që COVID-19  pati në gjithë vendin.

Për tu vlerësuar është kontributi i madh të Diasporës Shqiptare në komunitetet lokale ku ata jetojnë.

Besmir Rrjolli konsulent i IOM për rajonin e Lombardisë një nga rajonet më të prekura nga pandemia, bën një përmbledhje të përgjithshme të situatës së Diasporës Shqiptare në Lombardi.

“Ndikimi i koronavirusit tek komuniteti i Diasporës shqiptare në Lombardi vazhdon të ketë efekte të forta në jetën e përditshme. Edhe pse kohët e fundit ka pasur disa lehtësime rajoni i Lombardisë mbetet “Thembra e Akilit” për Italinë në këtë kohë pandemie. Ashtu si shumë të tjerë edhe shqiptarët po përballen dita ditës me probleme të ndryshme, si probleme ekonomike, sociale dhe familjare”, shprehet Rrjolli.  

Ai thotë se Diaspora Shqiptare në Lombardi i është përgjigjur menjëherë situatës së krijuar nga COVID-19. Janë të ndryshme iniciativat e ndërmarra nga shqiptarët sidomos në fushën e mjekësisë. Mjek, infermierë, operatorë sanitarë janë angazhuar për t’iu përgjigjur nevojave brenda dhe jashtë Italisë.

Përdorimi i teknologjive të reja dhe vullneti i jashtëzakonshëm i bluzave të bardha për të arritur dhe ndihmuar një numër sa më të madh personash janë një provë tjetër që diaspora shqiptare në Itali ka një potencial të jashtëzakonshëm si brenda Italisë, ashtu edhe në Shqipëri.

Pjesë e programit të IOM Albania “Angazhimi i Diasporës Shqiptare në Zhvillimin Social dhe Ekonomik të Shqipërisë” në Itali janë gjashtë konsulentë shqiptarë.