Autori shqiptar Avdi Beqiri, i cili jeton prej 26 vitesh në Itali, ka publikuar librin monografik “Veprimtaria e Shoqatës Kulturore “Bashkimi Kombëtar” në Itali”.
Si ngadhënjim mbi epideminë, libri është botuar nga shtëpia botuese “Lena Graphic”. Avdi Beqiri botoi librin e tij të parë, “Kujtimet e një mërgimtari”, në vitin 2013, në Prishtinë. Ky është libri i tij i dytë.
Avdi Beqiri u lind më 8 shtator 1957 në fshatin Dubofe të Drenicës, komuna e Vushtrrisë. Mësimet e para i mori në shkollën fillore “Azem Bejta” në vendlindje, ndërsa shkollën e mesme në Vushtrri. Për disa kohë (deri në vitin 1990) ka punuar në Ndërmarrjen “Universal” të Prishtinës, pastaj dy vjet në Zvicër dhe më 1992 kalon në Gjermani. Në prill të vitit 1994 vendoset në Itali, ku menjëherë u mor me aktivitete dhe veprimtari kulturore atdhetare.
Ishte ndër të parët që mori nismën për themelimin e Shoqatës “Bashkimi Kombëtar”, e cila u realizua më 12 mars 1995. Në fillim u zgjodh kryetar për grumbullimin e ndihmave, pastaj, në vitin 1996, u zgjodh kryetar i Shoqatës. Me themelimin e Fondit të Republikës së Kosovës në Itali u zgjodh anëtar i Kryesisë, ndërkaq pas themelimit të unionit të Shoqatave Kulturore Shqiptare, po ashtu u zgjodh anëtar i Kryesisë. Gjatë luftës heroike të UÇK-së në Kosovë ishte kryetar për ndihma financiare pranë Këshillit të Emergjencës.
Ishte edhe nismëtari i parë për hapjen e shkollës shqipe në Bassano, themelues dhe drejtues i skuadrës së futbollit në kuadër të shoqatës. Nga viti 2012, për dy mandate, është anëtar i Komitetit për binjakëzim komunash në këshillin komunal të emigrantëve në komunën e Bassanos del Grappa.
