Viti 1913 ka qenë i rëndësishëm për fatet e Shqipërisë. Më 21 maj të atij viti, kur ende ishte e fortë jehona e ngiritjes së flamurit të pavarësisë në Vlorë, shkrimtari dhe hulumtuesi arbëresh Zef Skiroi, lajmëron shtetin e ri shqiptar se të njëjtin veprim e kishin ndërmarrë edhe bashkëkombasit që jetonin në Itali.
Skiroi i dërgoi një telegram Ministrisë së Punëve të Jashtme të Qeverisë së Vlorës, me anë të të cilit njoftonte se Arbëreshët e Italisë e kishin ngritur flamurin shqiptar në Milano, në shenjë solidariteti dhe duke shprehur dëshirën e përbashkët për përparimin e plotë dhe lirinë e kombit të Skënderbeut.
