Pasojat e shkaktuara nga COVID – 19 duket se do të mbajnë gjatë në ankth shoqërinë, jo vetëm ndaj rrezikut të infektimit por edhe për pasojat që mund të shkaktojnë në jetën sociale dhe ekonomike. Pas përballjes me rrezikun e parë në fronin e luftës ndaj virusit mjekët duket se mund të përballen me një tjetër rrezik, atë të sigurisë së jetës. Gjatë këtyre dy muajve një pjesë e mjekëve dhe infermierëve kane humbur jetën për shkak të koronavirusit, por në të përditshmen e tyre mjekët dhe të gjithë punonjësit në shërbimin shëndetësor janë në rrezik të përhershëm për jetën e tyre.
Në Gjermani, aty ku edhe komuniteti i mjekëve shqiptarë është më i madh, Shoqata e Mjekëve Shqiptarë në Gjermani ka organizuar një seminar on line për të informuar anëtarët dhe të gjithë mjekët e interesuar për mundësitë e sigurimit të jetës që një mjek ka.
Gjatë këtij takimi on line Enea Çerçizi, këshilltar karriere dhe këshilltar financash, i specializuar në financat e specialistëve, akademikëve dhe mjekëve në Gjermani ka shpjeguar se me çfarë pritet të përballen tjetër mjekët veç koronavirusit. Si funksionon sistemi i këshillimit financiar dhe pse është e rëndësishme që çdo mjek të ketë një plan rezervë për të ardhurat e tij.
“Çdo person që është në marrëdhënie pune ose vetëpunësimi në Gjermani, ose si punëmarrës që ka të ardhura mbi 62.250 Euro Brutto në vit, ka të drejtën të zgjedhë midis sistemit privat ose shtetëror të sigurimit shëndetësor, për mundësinë në futjen e sistemit privat pa pengesa. Në çdo rast kryefjala është gjendja shëndetësore dhe për këtë arsye çdo njëri nga ju që ka qëllim apo mundësinë të jetë pjesëtar i sistemit privat me shërbime më të avancuara shëndetësore, këshillohet ta marrë këtë vendim sa më shpejt të jetë e mundur.
Në rastin e mjekëve rreziku është më i madh sepse në raste dyshimi apo infektimi me Coronavirus pagesat mujore mund te shtrenjtësohen përjetësisht, dhe pranimi në këtë sistem mund të bëhet i pamundur” ka shpjeguar ndër të tjera ai.
Sipas të dhënave të Shoqatës Mjekësore Gjermane në vitin 2018 numri i mjekësve shqiptar ishte 630, por numri real mendohet të jetë më i lartë.
