Shkrimtari dhe publicisti arbëresh, Italo Elmo i ka dhënë jetë një ekspozite virtuale që mundëson njohjen e kostumeve popullore të grave arbëreshe e cila këto ditë të qëndrimit në karantinë ofron mundësinë për të njohur më shumw traditën shekullore të veshjes arbëreshe.

Në një gërshetim të muzikës, fotografisë dhe multimedias, Elmo ka ndërtuar një prezantim me elementët kryesorë dhe dallues të veshjeve arbëreshe, të cilat dallojnë në varësi të zonave etnografike.

Si personifikim të paqes dhe vëllazërimit të Shqipërisë me Italinë, kostumet popullore tregojnë gjithashtu rendin shoqëror, moshën, klasën, punën, zinë, përfaqësimin e besimit fetar, si dhe statusin civil të një personi.

Italo Elmo njihet si promovues dhe organizator i eventeve kulturore e shkencore mes arbëreshëve të Italisë, si dhe drejton qendrën e Studimeve dhe Kërkimeve të traditave popullore italo-shqiptare.