Vendet në mbarë globin kanë mbyllur kufijtë, si masë për parandalimin e përhapjes së koronavirusit. Askush nuk e ka të qartë se deri kur do të zgjasin kufizimet, por kur kjo situatë të përfundojë, turistët mund të zgjedhin bukuritë natyrore të  Shqipërisë, për të pushuar.

E një ndër destinacionet mbresëlënse që nuk duhet humbur pasi pandemia e COVID-19  të ketë mbaruar është lumi i Shalës. I njohur ndryshe si Tajlanda shqiptare, në vitet e fundit ai është shndërruar në një ndër atraksionet turistike më tërheqëse të Alpeve tona.

Vizitorët e përshkruajnë si perlën e bukurive të Shqipërisë. Lumi i Shalës buron rrëzë Alpeve shqiptare dhe ka një gjatësi rreth 37 km, ndërsa grykëderdhja e tij është në liqenin e Komanit. Ngjyra karakteristike e lumit dhe shkëmbinjtë e thepisur, të cilët duken sikur prekin qiellin, të ofrojnë një panoramë mbresëlënëse.

Gjatë udhëtimit në këtë zonë turistëve u jepet mundësia të eksplorojnë edhe bukuri të tjera natyrore, ndaj kjo e bën këtë udhëti unik. Ata mund të vizitojnë edhe Shpellën e lashtë të Kaurrit, Gurin e Lekë Dugagjinit, Shpellën e Pëllumbave si dhe Ishullin e Paqes.

Ai është një atraksion i ri turistik pak i shkelur nga këmba e njeriut, i cili ka vetëm pak kohë që ka filluar të frekuentohet.  Përveçse ujit të kaltër, bukurisë mahnitëse përreth lumit kjo është edhe një zonë plot me vlera kulturore dhe historike.

Sipas gojëdhënave, princi Lekë Dukagjini i kaloi vitet e fundit të jetës në këtë zonë, ku gjen emërtime të tij si për shembull Guri i Lekës, një pikë strategjike që sheh luginën, nga ku mendohej që Dukagjini ruante vendin nga ardhja e turqve.