Gastronomia, si pjesë përbërëse e kulturës materiale, është shumë e pasur ndër arbëreshët e Italisë, gjë të cilën e dëshmon edhe libri “E(t)nogastronomia arbëreshe“.
Një libër me 610 receta gatimi dhe me 30 lloje verërash nga bota arbëreshë, përgatitur nga prof.dr. Andrea Shundi.
Ajo që bie në sy në emërtimet e gatimeve, është fakti se nuk përdoren turqizmat, gjë që shpjegon edhe lashtësinë e këtyre gatimeve me emërtime shqiptare.
Në libër parashtrohen realitete e(t)nogastronomike arbëreshe dhe mundësitë për zhvillime të mëtejshme, në mënyrë që këto të bashkërendohen me më të mirat e traditave të tjera, në funksion të njohjes dhe veçanërisht të përhapjes më gjerë të tyre, të zhvillimit edhe të turizmit enogastronomik në komunat arbëreshe.
Gjithashtu autori Andrea Shundi shpreh edhe përshtypjet e tij nga arbëreshet dhe shprehet se ata janë një komunitet i çiltër dhe që kanë një zemër të madhe.
