Libri këto ditë karantinë duket se ka fituar statusin e tij të dikurshëm, janë të shumtë lexuesit që i janë rikthyer këtij shoqëruesi të vjetër disa duke ju rikthyer autorëve të preferuar e të tjerë duke zbuluar autorë të rinj.

Një prej autorëve shqiptarë në Diasporë veprat e të cilit janë të vlerësuara gjerësisht është Ardian Kyçyku. Këto ditë ai ka vendosur që lexuesit ti mundësojë falas leximin e veprës së tij “Mortët”.

Vetë autori në rrjetet sociale ka njoftuar se romani i tij do të jetë falas për të gjithë lexuesit deri më 3 maj.

Romani është mbështetur mbi ato që njihen si  “legjenda urbane”. Një nga problemet që trajtohet në këtë vepër është lindja e borgjezisë, e Mortët përfaqësojnë një nga këto familje.

Në këtë libër autori shkruan “ka kujtime të së shkuarës dhe të së ardhmes; ka kujtime të asaj të ardhmeje që s’vjen kurrë, dhe kjo është e shkuara më e mbrapshtë e njeriut”.

Kyçyku, shkrimtar, poet, publicist, profesor është lindur në Pogradec më 23 gusht 1969. Ai mbaroi studimet e larta në Universitetin Shtetëror të Tiranës, në Fakultetin e Histori-Filologjisë, dega gjuhë-letërsi. Doktor i shkencave filologjike dhe doktorant në teologji në Universitetin e Bukureshtit. Anëtar i Bashkimit të Shkrimtarëve të Rumanisë, i Lidhjes së Shkrimtarëve dhe Artistëve të Shqipërisë, i Central European Academy of Science and Art, i Akademisë Evropiane të Arteve (AEA), President Ekzekutiv i European Academy of Performing Arts.

Shkrimtari është vlerësuar me titullin “Ambasador i Kombit”.