Virusi COVID-19 i ka marrë jetën një anëtari të komunitetit shqiptar në ShBA.
Shqiptari Vilson Hil Përlleshi, i cili po luftonte me koronavirusin ndërroi jetë dje në spitalin “Northern Westchester Hospital” në Mount Kisco të New York-ut.
Anëtarit të Këshillit të “Vatrës”, Lek Përlleshi, për gazetën “Dielli” ka thënë se: “Ende nuk po e besojmë se Vilsoni iku. Besonim shumë se ai do ta fitonte këtë betejë”.
Ndërkohë, ngushëllimeve të kësaj familje i është bashkuar edhe kryetari i Federatës Pan Shqiptare të Amerikës “Vatra”, Elemi Berisha.
47 vjeçari, Vilson Përlleshi, ka qenë emër i njohur në komunitetin shqiptar, ai është angazhuar për t’i ofruar përherë mbështetje dhe ndihmë bashkatdhetarëve të tij në SHBA.
Mbi 734 mijë persona janë të konfirmuar të prekur me Covid-19 në Shtetet e Bashkuara të Amerikës, sipas raportit të Universitetit Johns Hopkins. Në 24 oret e fundit u konfirmuan 1,849 të vdekur, ndërsa një ditë më parë ishin mbi 3400 persona që ndërruan jetë. Deri tani, në SHBA kanë ndërruar jetë pasi janë prekur me koronavirus 38,903 persona.
