Në Shqipëri informimi dhe këshillimi në këtë kohë të pandemisë ofrohet edhe për personat me probleme në spektrin e dëgjimit, kjo falë një projekti të financuar nga qeveria e Konfederatës së Zvicrës.

Nëpërmjet një publikimi në rrjetet sociale bëhet e ditur se në kuadër të programit “Askush të mos Mbetet Pas” (Leave No One Behind) nga UNDP dhe Kombet e Bashkuara, i cili financohet nga Qeveria e Zvicrës, do të mbështetet Shoqata Kombëtare Shqiptare të Njerëzve që nuk Dëgjojnë-ANAD. Ky program synon të ndihmojë jetën e njerëzve që nuk dëgjojnë, në këto kohë që gjithë vendi është në karantinë duke iu ofruar informacione përmes gjuhës së shenjave anëtarëve të këtij komunitet lidhur me situatën dhe zhvillimet rreth koronavirusit.

Në njoftim gjithashtu thuhet se do të krijohet edhe një linjë e posaçme 24-orëshe për të dërguar  kërkesa dhe për të siguruar shërbime përmes video-thirrjeve në platformën sociale “WhatsApp” për të gjithë personat që nuk dëgjojnë.