Shtetet e Bashkuara të Amerikës ndonëse po përballen me situatën e vështirë të shkaktuar nga pandemia COVID-19, kanë deklaruar se vazhdon procesi i regjistrimit të popullsisë. Organet zyrtare u kanë bërë thirrje qytetarëve që të plotësojnë formularin on line ose nëpërmjet telefonit duke respektuar në këtë mënyrë masat e vendosura për shkak të situatës emergjente të shkaktuar nga virusi.
Nëpërmjet këtij censusi, i cili për herë të fundit është realizuar në vitin 2010, shqiptarët mund të deklarojnë kombësinë e tyre. Në formularë është përfshirë një kategori për prejardhjen shqiptare.
Shumë prej shqiptarëve të vendosur në SHBA pavarësisht se kanë marrë shtetësinë amerikane kanë ruajtur dhe vazhdojnë të ruajnë traditat shqiptare ndër vite.
Nëpërmjet deklarimit individual të secilit shtetas me prejardhje shqiptare, në përfundim të censusit mund të nxirren të dhëna të sakta për numrin e shqiptarëve që jetojnë në SHBA.
Sipas të dhënave të censusit të mëparshëm të realizuar në vitin 2010, në SHBA jetojnë rreth 214,300 shqiptarë. Nga këta 86,600 mijë i përkasin brezit të parë të emigrantëve dhe 127,700 brezit të dytë, pra fëmijë të lindur në Amerikë nga prindër shqiptarë.
Komuniteti shqiptarë në Amerikë është ndër komunitete më të mëdha dhe më aktivë, me një numër të madhe shoqatash dhe organizatash të cilat zhvillojnë veprimtaritë kulturore në shumë vende të Amerikës.
Vlen të përmendet festivali shqiptar që organizohet çdo dy vjet, një dëshmi e fuqishme që tregon se shqiptarët ruajnë me fanatizëm kulturën dhe traditat shqiptare.
