Nora Gashi, mjeke e përgjithshme në një spital të Uestçesterit në Nju Jork, rrëfen mbi sfidat e personelit mjekësor gjatë kujdesit për trajtimin e pacientëve me koronavirus. Ajo thekson se duhet kujdes nga të gjithë qytetarët për të mundësuar kufizimin e të infektuarve nga COVID-19.
Mjekja shqiptare aprovon se sëmundja është shumë e rrezikshme, e paparashikueshme dhe e vështirë për tu shëruar.
“Në spitalin ku unë punoj, rreth 90% është adaptuar për pacientët me COVID-19. Ky virus nuk zgjedh rracë, nuk zgjedh moshë, nuk zgjedh a je mashkull apo femër. Kujdesi duhet maksimal edhe tek të rinjtë që mendojnë se kanë imunitet të fortë. Shifrat ditë pas dite po na tregojnë se virusi godet edhe të rinjtë pa asnjë sëmundje kronike”, është shprehur Nora.
Ajo nuk e fsheh frikën e saj dhe të të gjithë kolegëve që punojnë me të. Kujdesi për higjienën nuk i mungon pjesëtarëve të stafit mjekësor por edhe në SHBA ata kanë mungesat e tyre. Mjekja thotë se mënyra si ky virus erdhi nuk ka gjetur asnjë të përgatitur duke e bërë atë sa më vdekjeprurës. Nora Gashi shprehet frikë ka edhe për familjarët e saj në Kosovë. Nga informacionet që merr nga ata Nora ka theksuar se edhe pse Kosova po mundohet të marrë shumë masa asnjë vend nuk mund të jetë 100% i përgatitur.
“Roli im është të mar pacientët nga emergjenca dhe të mundohem ti shëroj. Disa janë me simptoma të lehta dhe të tjerë kanë nevojë për intubim me frymëmarrje të drejtuar. Ka pasur raste kur maskat e oksigjenimit nuk janë të mjaftueshme për ti mbushur ata me oksigjen dhe jemi detyruar ti vendosim në frymëmarrje të drejtuar. COVID-19 është shumë i rrezikshëm dhe koha qe nevojitet për tu shëruar është e gjatë”, bëri të ditur Nora Gashi.
Burimi origjinal, këtu:
