Federata e Mjekëve shqiptarë në Evropë (AMFE), publikon platformë on line nëpërmjet të cilës synon tu vijë në ndihmë shqiptarëve duke ofruar këshillim falas me mjekët.
Janë rreth 100 mjekë shqiptarë nga vende të ndryshme të botës të cilët do ti përgjigjen pyetjeve të bashkatdhetarëve nëpërmjet platformës “konsulto mjekun falas” .
Më herët Federata e Mjekëve shqiptarë në Evropë (AMFE), përmes disa video-mesazhe të shpërndara së fundmi në rrjetet sociale, sjell informacione mbi gjendjen aktuale të pandemisë dhe disa këshilla nga specialistët shqiptarë të shëndetësisë në vendet e ndryshme të Evropës.
Njëri prej tyre është anestezisti në Francë, Vedat Eljezi, i cili tregon se situata e kësaj pandemie globale është komplikuar në shtetin francez. Ai thotë se ka një numër të lartë të të infektuarve ndërsa në spitalet po kërkohet rritja e shtretërve për trajtim intensiv, pasi sipas tij ka mbi 5000 pacientë që kërkojnë trajtim. Mjeku anestezist apelon te qytetarët që të shmangin marrjen e medikamenteve dhe të zbatojnë masat e kujdesit thelbësor.
Situatë e ngjashme paraqitet dhe në Zvicër. Mjekja interniste shqiptare dhe njëkohësisht kërkuese shkencore në Universitetin e Bernit, Arjola Bano tregon se shteti zviceran ka shpallur gjendjen e jashtëzakonshme dhe ka mijëra persona të prekur nga koronavirusi. Si masa për parandalimin e përhapjes së virusit, ajo thekson qëndrimin në shtëpi si dhe respektimi i rregullave të higjienës personal.
Ndërkohë, Altin Ndroi, internist ne Spitalin Universtitar në CHU de São João të Portugalisë, i bën thirrje qytetarëve që të mbrojnë njëri-tjetrin sipas tij duke mbrojtur veten tonë mbrojmë dhe të tjetrin si dhe thekson ruajtjen e distancës sociale deri sa të kalohet kjo situatë.
Mali i Zi që deri para pak ditësh ishte i pa prekur nga koronavirusi, ka filluar të përballet me disa raste pozitive. Mjeku i përgjithshëm, Besmir Sella, duke iu referuar statistikave sjell një pasqyrë të situatës atje dhe i bën thirrje qytetarëve të izolohen dhe të ruajnë qetësinë.
Ndërkohë Fedarata është angazhuar për mbledhjen e një fondi për dërgimin e rreth 10 mijë maskave dhe mjeteve mbrojtëse nga koronavirusi nga Gjermania në Shqipëri.
