Shqipëria po njihet për kulinarinë e saj të vecantë, dhe një nga arsyet kryesore që e bëjnë gatimin tonë special, janë përbërësit origjinalë dhe aromatikë që rriten në vendin tonë. Vaj i ullirit, vera, bimët aromatike që rriten në tokën shqiptare janë unike. Tirana ka një sërë kantinash dhe fabrikash vaj ulliri.
Ju njohim këtu me një tur vaj ulliri në Marikaj:
Turi nis nga ullishtat 500- 1500 -2500 vjeçarë të kodrave në Marikaj, në një natyrë fantastike. Tradita e kësaj zone në prodhimin e vajit të ullirit daton që në kohërat e hershme. Janë dokumente historike që tregojnë se në shekujt 17-18 nga kjo trevë vaji i ullirit eksportohej në republiken e Venedikut dhe Shën Markut. Në këtë udhëtim do njiheni me varietetet që rriten në këtë zonë, moshën e drurëve, karakteristikat e ullinjve cilësorë dhe si duhet të kujdesesh për këto pemë që ato të kenë sa më shumë fryte çdo vit.
Turi vazhdon në fabrikë, shihet se si mblidhet ulliri me kujdes.
Fabrika nuk i shërben vetëm familjes për të bërë vajin e ullirit nga ullishtat e veta, por përpunon ullinj për dhjetra fermerë në gjithë zonën deri në Shkodër. Gjithë veçantia është si t’i shtosh vlerat vajit të ullirit për ta bërë atë produkt turistik. Duke mbledhur erëzat e zonës, familja ka arritur të prodhojë një sërë nënproduktesh të vajit të ullirit, që përdoren jo vetëm për gatim, por dhe në kozmetikë.
Pika e tretë e udhëtimit është dyqani i familjes, ku ekspozohen rreth 35 produkte nga vaji i ullirit, që nga sapunë aromatikë me vaj ulliri, erëza të ndryshme të zonës të thara me kujdes dhe paketuar bukur, çajra të zonës, suvenire me dru ulliri dhe lloje të ndryshe vajrash ulliri me ereza të ndryshme. Këtu mund të bëni dhe procesin e degustimit të vajit të ullirit, dhe të njiheni me disa karakteristika për ta dalluar një vaj ekstra të virgjër nga një vaj më pak cilësor. Shpesh degustimi shoqërohet me produkte te zonës, çajra, apo byrek me barishte të zonës.
Një tur i ngjashëm vaj ulliri mund të aplikohet nga gjithë fermëret që kanë ullishta dhe prodhojnë vaj ulliri. Nuk mjafton vetëm të prodhosh vaj cilësor, por të dish ta tregtosh dhe ta bësh atë tërheqës për turistët.
