Pushimi prej 14 ditësh për të gjithë punëtorët që udhëtojnë në Itali mund të shkaktoj pengesë për një pjesë të ekonomisë, reagojnë nga asociacioni “Makam Trans”. Është e domosdoshme Qeveria e Maqedonisë së Veriut të japë sqarim më të hollësishëm se si të veprojnë institucionet. Transportuesit udhëtojnë në shtete të ndryshme ku ka prezencë të virusit korona dhe nëse qëndrojnë në shtëpi të izoluar 14 ditë pas çdo kthimi në vend, atëherë ekonomia do të pësoj dëme të mëdha, shprehen nga Asociacioni.
“Qeveria rekomandimin e saj duhet ta zgjerojë dhe të ketë udhëzim shtesë si të veprojnë institucionet, pasi tashmë po më lajmërohen transportuesit se vozitës të caktuar që vozitin dhe kalojnë nëpër Itali, tashmë kanë probleme me çerdhet dhe shkollat ku nuk duan t’ua pranojnë fëmijët dhe paramendoni se çka ndodhë, vozitësi jeton nga kjo punë, nuk mbetet në shtëpi por sërish shkon në udhëtimin tjetër”-tha Biljana Muratovska, sekretare e përgjithshme e Makam Trans.
Ndërsa kompanitë që transportojnë udhëtarë jashtë vendit për Alsat thonë se vozitësit e autobusëve i respektojnë vetëm rekomandimet për mbrojtje, maska dhe pajisje. Nga kompania Rule Turs thonë se edhe përkundër paraqitjes së koronavirusit numri i udhëtarëve është i njëjtë si në vitet e kaluara. Ministri i shëndetësisë Venko Filipçe këtë apel e bëri që nga dita e parë pas paraqitjes së virusit në vend, por nuk saktësoi si të zbatohet ky rekomandim.
“Duam të bëjmë një apel deri te të gjitha institucionet dhe kompanitë ku ka të punësuar që në periudhën e kaluar kanë udhëtuar në Itali, të mos i pranojnë në punë, por rekomandojmë qëndrimin në shtëpi për 14 ditë”-pohoi Venko Filipçe, ministër i shëndetësisë.
Nga Organizata e punëdhënësve nuk morëm përgjigje nëse mungesa nga puna e të punësuarve që kanë udhëtuar në Itali, do ketë ndonjë ndikim ndaj biznesit.
Burimi origjinal këtu:
